ಹದಿನಾರರ ಹರೆಯ ಬೆಡಗಿ
ನೀನು ಮಾನಸಕಂಡ ಗೆಳತಿ
ನಿನ್ನ ಮನದ ಪಯಣವೆಲ್ಲಿಗೆ?
ನಾಲ್ಕು ದಿಕ್ಕು ನಾಲ್ಕು ದೋಣಿ
ಬದುಕಿದು ಮಹಾಸಾಗರ
ಯಾವ ದಿಕ್ಕು ಯಾವ ದೋಣಿ
ಎತ್ತ ನೋಡೆ ಸುಂದರ ||
ಕನಸು ಕಟ್ಟಿ ಹೊರಟೆ ಏನು
ದಡವ ಹೇಗೆ ಮುಟ್ಟುವೆ
ಮೊರೆವ ಶರಧಿ ಮನದಿ ಕಷ್ಟ
ಅದನು ಹೇಗೆ ಅರಿಯುವೆ ||
ಶರದಿಯಲ್ಲಿ ಕಾಯುತಿಹವು
ಹಲವಾರು ಜೀವಿಗಳು
ಎಚ್ಚರವಿರಲಿ ಪಯಣ ಬೆಳೆಸು
ಹೊಂಚುತಿಹುದು ಅವುಗಳು ||
ನಿನ್ನ ದೋಣಿ ಭದ್ರವಿರಲಿ
ಪಯಣ ಬಹಳ ದೂರವು
ದಡವು ಸೇರಿ ಮೆರೆವನೆಂಬ
ಲೆಕ್ಕ ಛಲವು ಸುಲಭವು ||
ಇಡುವ ಹೆಜ್ಜೆ ಹೆಜ್ಜೆಗಳಲಿ
ಇರಲೆಚ್ಚರ ಗೆಳತಿ ನಿನಗೆ
ಕಾಣದಂಥ ಕಲ್ಲು ಮುಳ್ಳು
ಅಡಗಿರುವವು ಅಲ್ಲಿಯೇ ||
ದೂರ ಬೆಟ್ಟ ಬಹು ಸುಂದರ
ಕಾಣುತಿಹುದು ಕಣ್ಣಿಗೆ
ಕಾಡು ಮೃಗಗಳು ಇವು
ಹೊಂಚುತಿಹುವು ಮೆಲ್ಲಗೆ ||
ಹದಿನಾರರ ಶೋಡಷಿ ನಿನಗೆ
ಜಗವೆಲ್ಲವು ಸುಂದರ
ಬಲು ಸುಂದರತೆಯ ಖಣಿ
ನಿನ್ನ ಹಿಡಿವ ಪಂಜರ ||
ಹೆಜ್ಜೆ ಇಡುವ ಮುನ್ನ ನಿನಗೆ
ಬುದ್ಧಿ ಇರಲಿ ಎಚ್ಚರ
ತಗ್ಗು ದಿಣ್ಣೆ ಇಹವು ನೂರು
ಬೇಡ ನಿನಗೆ ಆತುರ ||
*****
